Zoukonfts-schock

Haut fänkt rem ë neit Joer (2015) un a genau, wi firun 365 Deeg, ass rem jhidderee gespaant, wat di nächst 12 Méint eis wärte bréngen. Di läscht Joren a Jorzéngten hun eis eng ganz Reih Verännerunge bruëcht, gudder a schlechter. Fir dest Joër wir fir Lëtzebuerg do z. Bsp. just der puer erwähnt, wi d’Hausse vun der TVA oder d’Bestiëdnis fir gläichgeschlechtlech Koppelen. Ech gi lo kéng Wärtung of, wat “gudd” oder “schlecht” wir, wéll ech éischtens keen Expert sin, weder an der Ékonomie, nach am Sozialen a beetens, wir eng Kategoriséirung egal wéi réng subjektiv. Wat ech awer fir wichteg halen, ass, datt d’Mënschen sëch mat Verännerungen sollen aussernee setzen, um individuelle a genau sou um gesellschaftleche Niveau.

Ee vun de gréisste Problemer vun eiser Zäit, ass datt sëch ganz Populatiounen géint des Verännerungen sträuben, siëf dat lo op engem generationellen, intellektuellen oder gesellschaftleche Niveau. Als Beispill ging ët duër goen, sëch rtl.lu-Liëserkommentarer un zë kucken. Di weisen normalerweis ën extrem déiwen Level vun Intelligenz, mee stin trotzdem stellvertriëdend fir eng allgeméng Meenung (déi Zort, di een am Bistro um Comptoir ka matkréien). All Changement un eiser Liëwenskultur gëtt direkt kritesch bekuckt a fir schlecht empfonn. “Fréier hätt ët dat net ginn! Do wuer alles besser!” War ët dat wirklech? Gouf nët éischter just manner driwwer geschwat? Huët sëch net just eis Diskussiounskultur konnte méi entwécklen, déi verschidden Tabuthemen salonfäheg gemaacht huet?

All Verännerung soll a muss kritesch betruëcht gin. Wat net ka fonktionéiren, ass direkt wëllen dogéint zë stëppelen, wéll engem ë bestëmmten Aspekt dovun net passt. Eng statesch Welt ass net méiglech an ën Ofschiërmen dréit just dozou bäi, datt een sëch sélwer härno net méi kann erëm fannen. Vill Konflikter, di haut op der Welt existéiren, bestinn awer am Grondkär genau aus deem Problem.

Changementer sin inevitabel. Ee vun deene gréisste Changementer a läschter Zäit, ass d’Vitesse mat där des Verännerunge statt fannen. Den Zoukonfts-schock ka vu ville Leit net mi séier genuch verdaut gin.

Wat genau ass eigentlech dee Phänomen, deem säi Numm den Titel vun desem Artikel ass? Ët ass de Changement am Verhaale a Fonktionéire vun enger Gesellschaft, deen sou grouss ass, datt fréier Generatiounen ë net méi ginge verstoen. Bis firun ë puer honnert Joer wor dese Wiëssel normalerweis iwwert 4-5 Generatiounen verdeelt a konnt sou op engem individuelle mënschleche Niveau a genau sou fir komplett Populatiounen ofgeschwächt gin.

D’Kanner vun der Generatioun A, hu liicht aanescht geliëwt wi hir Elteren (a punkto Liëwensqualitéit, Mentalitéit, Technologien, etc…), mee hun sëch awer net sou vill vun hinnen ënnerscheed, datt een së net nach kinnt zu hirer Welt dozou ziëlen. De Kanner vun der Generatioun B ass rem dat Nämlecht widerfuër a sou weider… Ë grousse Changement huet sëch sou iwwert vläit ë ganzt Jorhonnert ewech gezunn, mee op engem mi klénge Niveau tëschent zwou Generatiounen wor keen Ënnerscheed zë gesin. Éischt vun der Generatioun E oder F un wir d’Generatioun A schockéiert gewiëscht, fir zë gesin, wéi di liëwen.

Mam Opkommen vu neien Technologien a gesellschaftlechem Wandel (Ofschaafen vum Feudalismus a Sklaverei, Industrie, Transport, Kommunikatioun…) woren d’Méiglechkeeten do, des Changementer mi séier an d’Wéeer zë leeden. Am 18.-19. Jorhonnert wor den Zoukonfts-schock schon op 2-3 Generatioune geschrumpft. Den Ënnerscheed am Zäitgeescht vun de Joren 1700 an 1800 war manner grouss, wi deen tëschent 1800 a 1900. Wann ee weider geet, ging ech souguer behaapten, datt ën Ënnerscheed mat der nämlechter Envergure vun 1800-1900, duerno schon vun 1900 bis 1950 existéiert huet (zwee Weltkricher hu natirlech och net gehollef, d’Gesellschaft net op d’Kopp zë stellen). An duerno huet d’Beschleunegung zougeholl an dauert bis haut un.

Wann een den Zäitraum 1900-1950 hëllt, sin dat just zwou Generatiounen an deenen sëch d’Welt zimlech vill verännert huet. Dat heescht, datt hei Grousselteren d’Welt vun hiren Enkelkanner méi wi just skeptesch gesin, vläit souguer net mi richteg kënne verstoen. Natirlech ass d’Mentalitéit vun enger Persoun ni statesch, mee probéiert sëch der Zäit un zë passen. Dat kann awer och just zu engem Deel geléngen, wann een an enger Zäit opgewuëss ass, di dat nach net gewinnt wor. Ët kann een engem net richteg ë Virworf maachen, wann ee Mënsch net mat engem Paradigmewiëssel d’Accord ass; schliesslech gin sou Ännerungen oft géint ganz Weltbiller fir, wou een sëch härno kann zimlech alléng gelooss fillen. Net desto trotz, ka keen de gesellschaftleche Wandel verhënneren a muss sëch ebe sélwer domadder ausernee setzen an eens gin.

Dëst Akzeptéiren vum Wandel (net onbedéngt vum Inhalt, mee réng vum Fakt datt Wandel statt fënnt), kinnt eng Reih Konflikter op der Welt scho léisen oder opmannst verkléngeren. Ë Fait, deen duerch den Accelerando vum Zoukonfts-schock ëmmer mi wichteg wärt gin. Wa mer nom 2. Weltkrich bei enger Längt vun 2 Generatioune louchen, ging ech behaapten, datt mer mëttlerweil bei enger eenzeger Generatioun ukomm sin. Duërch d’Benotzen vu neien Technologien (besonnesch Internet a Smartphonen) kënnen hautzudags Informatiounen, Meenungen a Noriichten (déi all zum Wandel bäidroën) am Nu iwwert de ganze Planéit verdeelt gin. Di heiteg Teenagergeneratioun ass mat dese moderne Medien opgewuëss a benotzt së wi selbstverständlech, d’Generatioun vun de “Millenials” (1979-1995, fréier och nach “Generatioun Y” genannt) hat och kee Problem domat, mee huet sëch awer scho missten aktiv domat auserneen setzen, fir së zë verstoën. Di Generatioun firdrun (“X”) dogéint huet së just luës a luës akzeptéiert a steet hinnen zu groussen Deeler zimlech skeptesch entgéint. D’Nookrichsgeneratioun gesäit di modern Kommunikatioun gréisstendeels negativ, oft wéll së së net versteet. Ech wëll natirlech net verallgeméngeren, wéll ët ëmmer Exzeptioune gin, mee gréisstendeels misst dat eng richteg Aschätzung sin.

Ët wärt fir eis immens wichteg gin, sëch op dat Phänomen vum Zoukonfts-schock kënnen an zë stellen, fir net mussen komplett vun ëm iwwerrascht gin an doduërch d’Schlappen zë verléiren. Den Accelerando wärt nämlech nach zu eise Liëwzäiten (ech schätzen 20-30 Joer) d’Schwell vun enger eenzeger Generatioun ënnerschreiden. Dat ging heeschen, datt, wann ee net informatiounsteschnech a gesellschaftlech um läschte Ball bleiwt, een iergendwann wärt séng eege Generatioun net mi verstoen. Eltere wärten hir Kanner sou friëm sin, wi Leit aus dem Joër 1800 d’Joër 2000. Dat kinnt dramatesch Konsequenzen hun an zu deem entspriëchende Problemer féiren, besonnesch wa Gesellschaften, déi op engem idiologeschen oder och réng geographesche Niveau getrennt sin, kéng Gemeinsamkeete méi kënne fannen.

Ausser, datt ee muss probéiren, ën oppene Kapp zë halen a sëch net vu firun an géint alles Neies sollt stellen, gesin ech net richteg, wéi een desen Dilemma kinnt léisen. Eng objektiv kritesch Edukatioun kinnt wuël hëllefen, mee misst wuël vu jhidderengem Eenzelne gedroe gin. Aanerersäits, vläit bréngt dat neit Joër an där Hisiicht ë Wandel an ët geet vill mi séier, wi ech duëcht? Oh Moment, dat hat ech jo scho firaus gesin!

An dësem Sënn, ë schéint neit Joër 2015 u méng Liëser!

Posted in Entertainment | 1 Comment

Flashback 2014

Als klénge Réckbléck op dat vergangent Joër, de beschte Film vun 2014, dat éischt grousst Meeschterwiërk vum metamodernen Zäitalter: “Too Many Cooks”!
(Weg. vum Ufank u kucken a net no fir dréien)

Posted in Entertainment | Leave a comment

De Gast op der Expo

Jo, dese Blog liëft nach! No iwwert engem Joër Abstinenz, gouf ët lo uërg Zäit, datt hei rem eppes stoë kënnt. Méng kuërz Visit op der Expogast 2014 huelen ech alt mol duerfir als Ulass.

Ech fänke lo net un, wi di neiste Blogger-Generatioun zu Lëtzebuerg, iwwert Iessen zë bloggen. Ech wärt mëch och net woën, kulinaresch Kritiken vun den Exponaten zë schreiwen. Duerfir fehlt mer di gastronomesch Expertise an dat kënne genuch aanerer vill besser. Ech probéire lo éischter mol méng Andréck vun engem populär-kulturelle Point-de-vue op zë lëschten.

Wat ee natirlech am éischten beandrockt, sin di immens opwänneg Liëwensmëttelskulpturen, di engem presentéiert gin. Gehéiert fir mëch perséinlech net onbedéngt zu engem kulinareschen Erliëwnis, mee ass nët manner impressionant. Verschidden Delikatessen goufen hei benotzt, wi z. Bsp. Kéis oder, am Fall vum taiwanesche Bäidrag, Colocasia esculenta, enger Planz/Wuërzel, vun där ech bis ëlo nach ni eppes héiren hat.
Skulptur aus Kéis Skulptur aus Taro

Ët gouf deen Owend och ë Kachconcours, fir deen een am Viraus konnt Ticketen bestellen. Ganz flott konnt een de Käch nokucken, wéll all Kichen (fir di verschidde Nationalmannschaften) grouss Fënsteren haten. Hei gesäit een z. Bsp. ën Dessert, deen aus enger Mini-iwwerdosis Schokela an Hambiër besteet.
Dessert aus Schokela an Hambiër

De lëtzebuergesche Menü, dee nawell och zimlech appetitlech ausgesin huet, gouf anscheinend mat lëtzebuergeschem Vodka zervéiert, wéi des Vitrine ee gleewen deet.
Lëtzebuergesche Menü

Rem zréck bei der Expositioun ass mer dunn nach dest italienescht Meeschterwiërk opgefall, dat aus Shortcake besteed.
Gotham City Skyline aus Shortcake

Erstaunt war ech och iwwertd’”Provencale”, di eng ganz Haal gelount an aménagéiert hat, inklusive Aquarium vun engem James-Bond-Bösewicht.
Miëresfriichtenaquarium

An iergendwéi haten së och de Fausti entzwousch erem fonnt (Stëchwiërder: produits du terroir, aged).
De Fausti on Tour

P.S.: Ech wärt mëch wuel demnächst no engem neien Designtheme fir des Säit mussen ëmkucken, wéll am Moment passe vill Biller optesch net gudd bei den Text.

Posted in Divers | 2 Comments

Ë puer Tippen, fir wiëhlen zë goen

- Géi an d’Kabinn a ruff haard “So mol ee STOP!”
- Je no Bezirk, benotz ë Wiërfel mat 7, 9, 21 oder 23 Säiten.
- Fro virdrun no enger Taass Kaffi a lies am Kaffisaatz.
- Fro dee firun der, wat ë gewiëlt huet. Wann ën äntwert, kuck op de Buëdem a maach d’Kräitz.
- Oder kuck ëm fir 2 Sekonnen ganz eescht riicht an d’Gesiicht a laach dann hard.
- Benotz de Bläistëft an enger Kabinn an den Wahlziëdel an enger aanerer.
- Fro, op’s de ë Wahlziëdel vun déngem eegenen Design kinns benotzen. Fänk un ën DIN-A0-Blaad auserneen zë faalen.
- Insistéier, dass de just mat rosa Wuëssfaarwen kinns wiëhlen.
- Fro dee no dir nom PIN-Code vu séngem Handy, multiplizéier dat mat der Unzuël vu Leit, di an der Reih stinn a wiël dementspriëchend kreativ.
- Wahlziëdelorigami.
- Wann’s de däi Konvokatiounsziëdel weis, fro no Zoufallszuëlen. D’Chance sin di nämlecht wi beim Lotto.
- Stolzéier mat enger Uniform a Gewiëhr an de Wahlbüro a buchstawéier däi Numm haart am Nato-Alphabet. Kuck dobäi riicht op d’Mauer a klaak um Enn d’Féiss beieneen.
- Wärf däin Ziëdel an d’Urn a fro op’s de nach kinns Fritten an eng extra grouss Cola dobäi kréien.
- Reklaméier, datt den Däischtere Meeschter op Nummer 666 fehlt.
- So ën erfonntene Numm a fro d’Leit, wéivill së der ginge gin, wann’s de dee wiëls.
- Fro jhiddereen, op së kënnen erooden, firwat’s de komm bass. So all Kéiers “Pssssssst!” wann së dat Wuërt “wiëhlen” benotzen. Kuck verdächteg ronderem dëch.
- Telefonsjoker.
- Hal däin Handy bei d’Ouer, ruff haard “Pardon, ech hu mëch verwiëhlt” a laach dann haart. Fro jhiddereen eenzel, op ën de Witz verstaanen huet.
- Fro, op së an engem aanere Wahlbüro besser Konditiounen hun, z. Bsp. aaner/méi Kandidaten oder eng bequem “Wahlfotell”.
- Brëll bei all Kräitz, dat’s de mëss, ën Zitat aus dem “Brunnen” vum 5e-Däitschcours.
- Schwätz mat all de Leit an der Reih ouni Verben zë benotzen.
- Rull dëch um Buëdem a blär “d’Stëmme wëllen datt ech CSV wiëlen” a géi an eng fötal Stellung.
- Wiëhl de SREL; dee lauschtert engem wéinstens no.
- Huël den éischte Numm um Wahlziëdel a fro d’Leit am Wahlbüro, op s’ët wirklech kënne gleewen, datt déi Persoun sëch opgesat huet. Widderhuël dat mat all deenen aanere Nimm.
- Fro, a wéi enger Sprooch’s de d’Kräitzer solls maachen.
- Bastel der aus Sëlwerpabeier eng Mutz an déi di un. Benotz Händchen a gëff jhidderengem zë verstoën, datt “SI” soss déng Fangerofdréck an DNS eraus fannen.
- Fro, op’s de och nach däi Choix fir di läscht Wahlen rem kinns réck gängeg maachen.

Posted in Nonsens | 1 Comment

Rezepter uëchtert d’Joër

Ech weess, lang war näischt méi hei zë liësen, duerfir séier ë Rezept vun eppes, wat ech grad gemaat hun. Genau dat Richtegt fir an der Summerhëtzt!

Toblerone-mousse

250g Mascarpone
100g Toblerone (oder eng Staang)
3 Eegiël
2 Eewäiss
70g Zocker
1dl Rahm
100g zergrimmelt Petits-Beurren (mat Mëllech oder Botter)

De Schokola zum Schmëlze bréngen (bain-marie oder Mikrowell).

D’Petits-Beurren mam Botter oder der Mëllech zerdrécken an ën Deeg draus maachen.

D’Eewäiss zu Schnéi vermixen. D’Eegiël mam Zocker mixen an dann de Mascarpone luës drënner vermëschen. Uschléissend de flëssege Schokola drënner hiëwen. Dann mat der Schlagsahn (vum Rahm) an zum Schluss dat nämlecht mam Schnéi maachen.

Dann mat engem Deel vun der Masse de Buëdem vun enger Schossel bedecken, den Petits-Beurre-Deeg driwwer léeën an de Rescht vun der Mousse luës driwwer schëdden. Als Dekoratioun kann een dann nach Kakaospudder wi bei engem Tiramisu driwwer pudderen. No ë puër Stonnen am Tiefkühler: genéissen!

Posted in Personal & Hobbies | 1 Comment

Lëtzebuerg um Internet: Den Ufank, Deel 1 (1)

Dat wat di meescht Leit haut mam Internet verbannen, ass den World Wide Web. Dee gouf awer éischt 1991 op d’Bee gesat, den Internet hat dee Moment sélwer schon technesch gesin 22 Joër. Am Ufank wor ën als amerikaneschen Universitéits- a Militär-projet natirlech nach nët sou international wi ëlo, mee spéitestens an den 80′er Joren sin och an Europa eng Reih Usergruppen entstaanen. Dat war deemols (ausserhallef vun Universtitéitszentren) wahrscheinlech nët sou einfach drun zë kommen, wéll opmannst an Däitschland Modemen (fir iwwert d’Telefonsleitung eng Dateverbindung opzëbauen) deelweis verbuëde waren. Ech huëlen un, datt di lëtzebuergesch Post do wuël kaum méi fortschrëttlech wor.

Wat fir Servicer goufen ët dann domols um Internet? Dee berühmtesten ass natirlech d’Email. Wiën lo genau di éischt lëtzebuergesch Email geschriwwen huët, wärt wuël kaum méi fest zë stelle sin; weider Informatiounen do driwwer konnt ech och nët fannen.

Een aanere Service, deen éischt spéider an den 80′er a 90′er Joren an den Internet intégréiert gouf (nodeems ën zënter 1980 an eegene Réseau’en existéiert huët), ass den Usenet. Di mannsten wärten hautzudags de Usenet mat sénge Newsgruppen nach kennen; séng Fonktiounen goufen am läschte Jorzéngt gréisstendeels duërch Websäiten iwwerholl. Wat een sëch drënner fir stelle kann, ass eppes wi eng Zort thematesch getesselt Mailinglëscht. Ët hat een ë Newsclient (bei verschiddene Mailclients wor een dobäi) mat deem een op ë Server zougegraff huët (z. Bsp. news.individual.de/). Dann kruut een eng Lëscht mat alle verfügbaren Newsgruppe geliwwert. Déi waren a sougenannt “Hierarchien” gegliddert, z. Bsp. de.* fir däitschsproocheg Gruppen, news.* fir Noriichten, comp.* fir Computerthemen. An den 90′er ass och eng lu.* fir Lëtzebuerg entstaanen, ët woren awer leider nët vill Newsserveren, déi di Hierarchie gefouert hun.

Di am meeschten vu Lëtzebuerger benotzten Newsgrupp war alt.letzebuerger. Dee Grupp ass 1993 entstaanen a wahrscheinlech vun ETH-Studente gegrënnt gin. Ëm d’Jordausendwenn hat di Diskussiounsronn nawell eng ganz Reih Stammschreiwer di all Woch eng ronn Dozen Diskussiounen lancéiert hun (méng Wéinegkeet wor och dobäi). Wiën interesséiert ass, fënnt dee gréissten Deel dovun bei Google Groups erëm. Dëse läschte Link féiert och zum Gronn, firwat de Usenet hautzudags quasi nët mi vill benotzt gëtt. D’Newsserveren haate meeschtens just ën Noriichtenarchiv vun 2-4 Wochen, wann een eppes mi Aales wollt nosiche goën, huët ee missten entweder op den eegenen Archiv zougräifen (deen een all puër Deeg sélwer aktualiséiert huët) oder op verschidden Websäiten, di hir Datebanken mat enger Reih Newsserven synchroniséiert hun. Eng vun deene gréissten Säiten war deja.com. No finanzielle Problemer war dee Site un eBay verkaaf gin a Google huët hir Newsdatebank 2001 iwwerholl. Deja News gouf dunn a Google Groups integréiert, ee Grond, firwat vill Leit hautzudags méngen, datt Newsgruppen dat nämlecht wi Webforen wiren. No engem groussen Influx vu neien Useren, di guër nët iwwert di traditionnel Systemen op d’Newsgruppen zougegraff hun, mee iwwert Websäiten an sëch deem entspriëchen och nët un di üblech Netiquette gehal hun, sin di aal Stamm-liëser a -schreiwer op aaner Plaatzen ausgewandert. alt.letzebuerger ass mëttlerweil zimlech verwaist, mat mol kénger Dozen neier Noriichten d’Joër.

Posted in Internet & PC, Kultur | 1 Comment

Lëtzebuergesch Internet-Archeologie: Ë Projet

Dësläscht gesouch ech (den Imparfait gëtt am Lëtzebuergeschen vill zë mann benotzt) op Facebook, datt wuël iergend een ën aale Backup vun party.lu muss fonnt gehat hun. Op enger Fanpage gi lo luës a luës all di aal Photoen zréck bis 1998 gepost, inklusive dem Taggen vun de Leit, wat deenen wuël méi oder manner angenehm wärt sin. Dat hat mëch rem drun erënnert, datt ech ët schuëd fannen, datt oft aal Säiten verschwannen, wann ë Content-Provider zou mëcht, wéi dat lo fir d’läscht bei Geocities de Fall war. Ee vun deenen éischte Servicer, wou ee konnt gratis eng Websäit online stellen (ech hat do, wann ech mëch richteg erënneren, 1997 oder 1998 eng hi gesat). Ech kenne Mënschen, di mi jonk sin, wi verschidde Websäiten op deem Site. Eng grouss Hëllef, fir Verluërenes rëm zë fannen, ass natirlech den Webarchiv. Mee och, wann een do alt deen een oder aanere Schnappschoss vun enger Websäit kann entdecken, informéiert ën awer nët direkt iwwert dat, wat d’Leit an där Zäit och wirklech gekuckt hun. Informatiounen iwwert den Zäitgeescht an di Säiten, di grad “in” woren (ech weess, Anglizismen sin “out”), fehlen do. Besonnesch Lëtzebuerg ass a punkto Internet-Archeologie nach éischter Entwécklungsland.

Fir ët zoukënftegen “Cyberhistoriker” (“cyber” ass och sou ë Wuërt wat eigentlech just an de 90′er benotzt gouf) mi einfach zë maachen, wärt ech a nächster Zäit probéiren, e klénge Résumé vun deene läschten 20 Joër Internet zë zéien; opmannst, wat de lëtzebuergeschen Deel dovun betrëfft. Domat era bezéihen wärt ech all Säit, di iergend ee Rapport mat Lëtzebuerg hat; nët nëmmen Säiten di ënnert dem lëtzebuergeschen TLD “.lu” gelaf sin. Ménger Recherche bei dns.lu no, ass de lëtzebuergesche Registrar 1992 vun der Restena gegrënnt gin (ech hat irrtümlecher Weis ëmmer 1995 am Kapp). Ech wärt dat Ganzt chronologesch ufänken, am Ufank wahrscheinlech ë puër Joëren pro Artikel bündelen an éischt bei mi rezente Joren splécken. Ët wärt ëm Villes goën: den “Rise and Fall” vun de “killer nightlife reporting”-Säiten, de groussen TLD-Massaker vun 2001, di éischt zaghaft Online-Versich vun der lëtzebuerger Press a nach villes méi.

Wann der Suggestiounen, Bemiërkungen oder soss welch Informatiounen hudd, wou der méngt, dat misst onbedéngt dozou gehéiren a fir d’Nowelt erhaale bleiwen, da schreiwt ët mer an d’Kommentaren. Ech si gespaant, wat doraus gëtt!

Addendum: Ech wärt dat Ganz nët strikt chronologesch tesselen, mee thematesch. Verschidden Themen kann ee nët pro Joër begrenzen.

Posted in Internet & PC, Kultur | 4 Comments

Generatioun Juncker

No verschiddenen Texter (vum Max, vum Thierry, vum Manuel, vum Joël) hun ech och mol ë puër Gedanken zu deem Thema opgeschriwwen.

Eng vu méngen éischte Begéignungen mat der lëtzebuergescher Politik hat ech ongeféier am éischte Schouljoër, wann ech mëch richteg erënneren. Haut ging een dat 2. Cycle 1. Joër Grondschoul nennen oder sou. Muër vläit och rem aaneschters, kënnt drop un wat d’Politik décidéiert. Dat war sou ëm 1986 an ech hat an engem Molconcours eppes gewonnen. D’ganz Klass hat mat gemaacht bei deem Molconcours. Ech war den 2. gin (eng Reih aaner Kanner och). Ech weess nët méi wat ech gemolt hat. Ech hat ët domols, genausou och nach wi haut, just zimlech erstaunlech fonnt, datt iwwerhaapt een eppes vu mir gemooltenes ging gudd fannen, wéll ech an deem Konschtberäich iwwerhaapt keen Talent hun. Ech wosst domols schon, datt wahrscheinlech einfach iergend ë Lous mäi Schicksal décidéiert hat an dat Ganzt just als profiléirend Reklamm fir d’Politiker bei der Präisiwwerreechung geduëcht war. Kanner sin heiansdo naiv, mee nët onbedéngt domm.

Ech sin dunn mat méngen Elteren an de Staatsministère bei der Place Clairefontaine invitéiert gin a souss an engem klénge Sall mat enger Dozen aanere Familljen. Ech hu mëch wirklech op mäi Cadeau gefreet. Ët sollt sou ë kléngt Nintendospill sin (de Gameboy koum éischt 3 Joër mi spéit eraus, dee war fir d’Kommunioun). D’Spiller louchen a Kadospabeier agepaakt op engem Dësch am Eck. Während di ganzen Zäit ën éeleren Här do stoung a geschwaat huet, si méng Aan ëmmer rem op deen Dësch hi gewandert. Firwat hätten së eis nët kinnten als éischt de Präis iwwerreechen an dann d’Riëden haalen? Da wire mir Kanner wéinstens roueg a beschäftegt!

Méng Eltere sote mer, deen Här, deen do stoung zë schwätzen, wir de Santer. Dat huët mir nët wirklech weider gehollef, d’Spill louch nach ëmmer am Eck um Dësch. No ongeféier gefilltenen 3 Stonnen (a Réalitéit woren ët just 2 Stonnen) wor dunn dee “Santer” endlech mat sénger Riëd färdeg. Ech ka mëch net méi drun erënneren, wat ë sot, mee ët wärt deen üblechen politesche Bullshit-Bingo gewiëscht sin: “Kanner sin eis Zoukonft… blah blah… mussen an hir Kréativitéit investéiren… blah…” Ech kennen de Politschwätz aus den 80′er Joren nët, mee hautzudags wäre wuël Wiërder wi “Nohaltegkeet”, “Synergien” a “700.000 Awunner-staat” gefall.

Ët war eigentlech lo nët wirklech ë prägend Erliëwnis, mee wann ech richteg iwwerléen, hun ech och haut nach ëmmer dee nämlechten Androck vun der lëtzebuerger Politik. Aal Männer stin hannert engem Riëdnerpult, schwätzen iwwert Gott an d’Welt (nët onbedéngt an där Reihefolleg); op dat lo eng Podiumsdiskussioun an enger Bank oder ë Parteikongress am Centre Culturel vun engem kléngen Éislécker Duërf ass. Hir Paltongen richen no Zigaretten an Alkohol, ë Geroch, deen si a kléngen däischtere Kummeren mat giël/brong gemusterten Tapéiten opgegraff hun. Déi Kummeren wou si iwwert hir zoukënfteg politesch Projeten décidéiert hun. Nämlech, datt së näischt gingen änneren; ët war gudd sou, wi ët war. Wiëssel wor schlecht, wéll den Ausgang ongewëss. Sou hun ech mer dat ëmmer fir gestallt; ët ass fir mëch ë Sënnbild an Epitom vun der lëtzebuergescher Politik vum 20. Jorhonnert.

De Juncker war do anscheinend ganz aanescht.

1995 hat ech 15 Joër, Lëtzebuerg war Kulturhaptstad, pardon Haptstad vun alle Kulturen (wéi dat domols politesch korrekt geheescht huët) an ech hu mëch nët immens fir Politik interesséiert. Dat ass éischt ë puër Joër mi spéit geschidd, wou ech fir d’éischte Kéier konnt mat wiële goen. Ee Numm, deen een iwwerall héiren huet, wor ëmmer dee vum Juncker. Wee wor dat eigentlech? Kloër, dat ass eise neie Premier, souvill wosst och ech. Mee wat genau huët hiën ausgemaacht? An deene Joren duerno huët sëch mir ë relativ vast Bild vun dëser Persoun présentéiert. Hië wor iergendwéi aanescht, wi di aal Hären firdrun. Ët wor ë frësche Wand am Spill. Aaneschters wi déi firdrun, huët hien oft no sénger Nuës geschwaat an aaneren séng Meenung kond gin. Wou firdrun alles ëmmer an di nämlecht Routine gefall ass a keen engem op d’Zéiwe getrëppelt ass, fir datt dat Nämlecht nët och mat engem sélwer ging geschéien, huët de Juncker uge-eckt. Hiën huët “deenen do uëwen” mol séng Meenung gesot (obschons hien sélwer ganz uëwe wor). Dat huët mer gefall, datt huët och dem klénge Mann vun der Strooss gefall, dat huët all Lëtzebuerger gefall.

An dann all di Plaatze wou ën zë gesi wor an all di Leit mat deenen ën zë gesi wor. Hien ass duërch ganz Europa gereest an huët jhidderee kannt. Hië war op per du mam Kohl an huët souguër Interviewen op der däitscher Telé gin! Ë Lëtzebuerger am Ausland op der Telé! Dat huët dem nationale Mannerwärtegkeetsgefill gudd gedoën! Endlech gëtt ët och ë Lëtzebuerger, deen op der Weltbühn kann optriëden a vun enger Versammlung mat deene Groussen an di nächst reest. A wat huët ën sëch och fir Europa agesaat?! All Kéiers, wann rem ë Miesepeter géint d’EU oder den Euro gemeckert huet (gedu, Groussbritannien), wor hien direkt do! Hië wor de Mr. Euro, huët mam Schroeder a mam Chirac, Merkel a Sarkozy gepotert a Sonndes Owes wor ë rem an enger Talkshow op der ARD. Wat hun d’Lëtzebuerger gegrinst, wann ë rem ee Sproch lass gelooss huet oder dem Berlusconi heemlech mat der Hand op d’Glatz geklappt huet.

Bei de Wahlen 2004 ass mer dunn eppes komesches opgefall. An de Méint firdrun hun ech duerchaus negativ Artikelen iwwert de Jean-Claude Juncker geliës. Natirlech woren déi Texter aus engem Deel vum politesche Spektrum, deen ee lo nët als “noh” zur CSV konnt bezeechnen, mee trotzdem duëcht mer, nujee, da war ët dat alt mam Juncker, ën hat eng schéin Zäit, mee wië weess, wat no de nächste Wahle kënnt. Wat koum, wor de Juncker. Natirlech, sin déi, di am härtste blären, nët onbedéngt ëmmer an der Majoritéit. Dat wor fir mëch eng Ursaach fir dat gudd Ofschneiden vun der CSV an deene Wahlen. Aanerersäits hun ech a méngem Ëmkrees awer och vill Leit héiere soën: “Jo, wien solle mer da soss wiëlen? Zum Juncker gëtt ët jo einfach kéng Alternative!” Dat wor ë Prinzip, mat deem ech nët averstaane war. Eng Persoun zë wiëlen, wéll ee mat hirer politescher Vue d’accord ass, wor eng Saach. Eng Persoun zë wiëlen, just wéll së dat mi kléngt Iwwel ass, eng aaner. Ech hun ët interessant fonnt, datt de Juncker ët tatsächlech färdeg bruëcht hat, séng Persoun op eng Positioun zë maneuvréiren, di komplett ausserhalb vum politesche Spektrum stoung. De Lëtzebuerger huët de Juncker nët gewiëlt, wéll hien vun ëm iwwerzeegt war oder ën ë fir dee richtege Mënsch op der richteger Plaatz fonnt huet, mee einfach just wéll hien de “Juncker” war. Datt ë gewiëlt gouf, wor iwwerhaapt kéng Fro. Ech hun dat nët gudd fonnt; Persounen, di sollen aaner Persounen représentéiren a vun hinne gewiëlt gin, sollten och versichen sëch ëm deenen hir Gonscht zë bewerben. Eng Positioun, di ëmmer fest steet, onofhängeg vum aktuelle politesche Wand, ass nët nëmmen ongesond, mee kann och zu engem kompletten Vu-sëch-sélwer-iwwerzeegt-sin féieren. Dat Ganzt ass mer an eng geféierlech Richtung gaangen. Dat Gefill huët sëch bei mir verstärkt, wéi 2009 rem dat Nämlecht geschidd ass.

2005 wor fir mëch dunn ë Wendepunkt an der Art a Weis, wéi ech de Premier gesin hun. Méintlaang ass Reklamm gemaacht gin, fir beim Referendum iwwert d’EU-Verfaassung mat Jo zë stëmmen. Ech hun dat als eng positiv a wichteg Kampagne gesin; d’Vollek sollt sëch wirklech domadder auserneen setzen, fir kënnen eng ordentlech Grondlag vun engem modernen Europa zë bilden. Mam Text vun der Verfassung sélwer wor ech awer deelweis nët averstaanen. Wéi genau sollt ech also wiëlen? Sollte mëch di positiv Aspekter iwwerzegen a mëch zu engem Jo verleeden oder kinnt ech mëch genuch un deenen negativen Aspekter stoussen a mat Nee ofstëmmen? Dat wor nët einfach, mee ech wor frouh, datt mol endlech dat europäescht Vollek gefrot gouf, wéll och haut nach gëtt d’Demokratie op EU-Niveau (ofgesinn vum EU-Parlament) relativ kléng geschriwwen. Eng Konstitioun fir d’Vollek a vum Vollek décidéiert.

Mee du koum d’Bomm. Nodeems sëch a ganz Europa eng ëmmer méi negativ Meenung iwwert d’Verfassung breed gemaacht huet, wéll ower di negativ Ajouten iwwerweit hun, sot de Juncker zum lëtzebuerg Vollek: “Entweder dir wiëlt mat Jo oder ech gi ménger Wee!” Dat wor fir mëch eng erschreckend Ausso, wéll së eendeiteg als Erpressung z’identifizéire wor. Ech duëcht mer, wien ass dee Mann, datt hien kann ë ganzt Vollek forcéiren an enger demokratescher Ofstëmmung (sou eng, di hiën zum Premier gewiëlt huët an där hien sollt dankbar sin) sou of zë stëmmen, wéi hien ët gär hätt? Dee Moment war ët bei mir kloër eriwwer an ech hat décidéiert, mat Neen of zë stëmmen (dat heitent ass och di eenzeg Kéier, wou ech soën, wéi ech bei enger Wahl ofgestëmmt hun). Ech verhandele nämlech nët mat Erpresseren. Dat wor eng Denkweis, vun där ech duëcht, datt aanerer së och gingen deelen. Aanerer, di dee Moment genausou enttäuscht vum Juncker ware, wéi ech. Domat stoung ech anscheinend awer zimlech alléng a méngem Bekanntekrees duër. “Jo, wat solle mer da soss wiëlen? Zum Juncker gëtt ët jo einfach kéng Alternative!” Di aal Leier alt erem. “Wiëssel ass schlecht.”

Zënter deem Moment stoung ech dem Här Juncker zimlech kritesch géigeniwwer. Ëmmer méi kléng Faux-pas’en a fragwürdeg Décisiounen si mer opgefall. Dee Standpunkt “Wann ët eescht gëtt, muss ee léien” wärt wuël all Politiker behärzegen, mee fir dat öffentlech op der däitscher Telé bekannt zë gin, kéim am Ausland quasi politeschem Suizid gläich. Beim Juncker léisst een dat duërch goen, wéll… hien ass jo de Juncker. Wann ee jorelaang an der Affär Bommeléer (iwwregens eng Affär di och vun 1986 ass, siehe 1. Paragraph) zwee- bis dräi-deiteg Aussoën an de Medie mëcht, ouni eppes Konkretes zë soën an een d’Vollek vun enger Saakgaass an di aanert féiert, fannen ech dat méi wi fragwürdeg. Wann sëch doraus rëm weider Affären erginn (Krise vun 2008, opgeholle Gespréicher, Geheimdéngscht, etc…) an ee kéng Responsabilitéit unhëllt, obschons een zanter 18 Joër Staatsminister an domat Chef vun all deenen implizéierte Servicer a Persounen ass, fannen ech dat just nach lächerlech. Gëtt ët wirklech nach ëmmer kéng Alternative? Ass Wiëssel nach ëmmer schlecht, sou wéi mer dat schon zënter iwwert engem halwe Jorhonnert fir gepriëdegt kréien? Firwat nët einfach mol d’Vollek décidéire loossen?

Ma d’Vollek ka jo décidéiren an zwar bei de nächste Wahlen! 2014 (mer sin 2013) wärt ech awer och rëm wëssen, wéi d’Resultat wärt ausgoën. Dee schon uëwen erwähnte Mannerwärtegkeetskomplex vum lëtzebuergesche Vollek erlabt ët ëm nët, Courage zë weisen an sëch mol ë Wiëssel zë trauen. De Lëtzebuerger meckert léiwer um Staminet, wat “déi do uëwe” rem fir ë Blödsinn maachen, mee am Wahlbüro léisst een sëch léiwer nët op Experimenter an. Wiële geet ee nämlech moies, wann ee nach niichter ass. An an där enker Wahlkabinn, wou ee lénks, riëts a firun sëch eng schwarz Wand gesäit, freet een sëch op eemol, op ët nach mi schlëmm kinnt kommen. Vläit kinnt ët jo och besser gin, mee firwat iwwerhaapt ë Risiko agoën, wann ee rem op di nämlecht Plaatz ë Krop kaa machen, wi di Kéier firdrun?

Ët weess ee nämlech, datt iergendwann och de Juncker zë aal fir d’Politik gëtt a spéitestens dann, gëtt ë neie Premier gewiëlt. Iwwerloosse mer dat léiwer einfach der nächster Generatioun. Ët huët een sëch lo sou laang un ë gewinnt, firwat iwwerhaapt no Alternative sichen? Ech färte just, datt d’Junckeriséirung vun der lëtzebuerger Politik iergendwann ë grousst Lach wärt hannerloossen, dat nët einfach zë fëlle wärt sin, wéll sëch ë ganz Vollek un dese Status quo gewinnt huet an dee Moment nët wéisst, wouhin. Mee ët wollt jo kee Wiëssel, wann dee nach méiglech ass, wéll Wiëssel ass nämlech anscheinend schlecht!

Addendum: De Magazin Forum huët ë nawell zimlech interessanten Artikel iwwert de Personnage vum Jean-Claude Juncker.

Posted in Divers | 1 Comment

Comeback-kritiken

Sorry! Ech hun opginn! Ech si mëttlerweil ësou vill Episoden am Réckstand, datt ech ët mer einfach nët méi undin, iwwerall eng Kritik zë schreiwen. Ass u sëch schuëd, mee ech kann och näischt dodrun änneren. Okay, ech kinnt, mee ech hu kéng Loscht dozu.

Fir méng éirewärt Liëser trotzdem nët z’enttäuschen, posten ech alt wéinstens eng Lëscht mat de Seriereferenzen vun den Episodentitelen:

1×07 “Zwee an en halwe Mann”: “Two and a Half Men”
1×08 “All an der Famill”: “All in the Family”
1×09 “Jong begéint d’Welt”: “Boy Meets World”
1×10 “D’Nounou”: “The Nanny”
1×11 “Familien Banden”: “Family Ties”
1×12 “Glécklech Schlusser”: “Happy Endings”
1×13 “D’ganz Nuecht op”: “Up All Night”
1×14 “Wäiss Schippen”: White Collar
1×15 “De frësche Prënz vu Bouneweg”: “The Fresh Prince of Bel-Air”
1×16 “Kollegen”: “Friends”
1×17 “Verréckt no Dir”: “Mad About You”

Posted in Entertainment, Kultur | Leave a comment

Comeback 1×06 “Gehemmten Entwécklung”

Referenz fir den Episodentitel: “Arrested Development

“Ech wollt awer op méng Schokola- a Playmobil-Convention goen!”

Uiuiui, ech sin nach ëmmer zwou Episoden am Réckstand, iergendwann wärt ech bei der aktueller ukomm sin. Sidd gedëlleg, jonk Padawanen.

Den Titel passt natirlech rem punktgenau op den Inhalt vun der Episod (wiën hätt dat geduëcht?). Iergendwéi ass jhiddereen an enger gewëssener Hisiicht liicht behënnert. De Pit probéiert, wéi gewinnt, beim Sophie zë punkten a miërkt just luës, datt hien ëm nët ëmmer kann wéi ë Mippchen nolaafen a léiere muss och mol Nee zë soën. Mee am Fong geholl kann a wëll ën dat natirlech net. D’Sophie sélwer kritt net vill vu sénger Ëmwelt mat an denkt just un de Felix, deen him de Kuërf gin hat a probéiert sëch rem un deen erun zë maachen. Wat ëm härno och geléngt. An dat wahrscheinlech och just wéll de Saack ët net ka léieren sëch mol langfristeg un ë Meedchen zë bannen an direkt eppes mam Felix sénger neier Schécks (iergend sou ee 08/15-Model) ufänkt. An de Ronny leeft an deene polygonalen Bezéihungskëschten hin an hir a fillt sëch net fir sérieux geholl. No engem enttäuschte Liëwen spillt hien méi wi fräiwëlleg d’Roll vum klénge Kand, leeft mat séngem Petzi ronderem a klaut Schokola. D’Story hällt och éischter melancholesch op, wéi kee richteg op där Plaaz ukënnt, wou ën eigentlech hi wollt. De Ronny kann zwar rem gudd Musék maachen, mee muss sëch als éischt nach als erwuëssene Mënsch beweisen, de Pit ass nach ëmmer alléng an de Saack an d’Sophie siche rem Léift op lauter falsche Plaatzen. Deen eenzegen, deen sëch weider entwéckelt huet, schéngt de Bob hannert dem Comptoir zë sin, deen sëch net méi als Mary verkleed hued. War do eng Wett eriwwer oder hun ech eppes verpasst?

De Plot ass mol iwwerraschend sérieux an ët kinnt een ët scho bal als ‘nodenklech’ bezeechenen. Iergendwéi hun ech mëch un d’Gag’en gewinnt a fannen së mëttlerweil nawell witzeg. Mat der Petzicam de Ronny beim Undoen z’iwwerwaachen war duerchaus ë klénge “LOL” derwärt an dee blöde Video mam Aaf a mam Fräsch hun ech och op YouTube gesicht. Hätt ech dat léiwer nëmme gelooss!

<- Comeback 1×05 “Wéi ech deng Mamm kennegeléiert hunn”

Posted in Entertainment, Kritiken, Kultur | Leave a comment