popcornschluecht

Vun Zäit zu Zäit kréien ech nei Blogen fir d’Blogbuerg proposéiert. Dat war lo rëm de Fall an di virgeschloen Säit wor kenuvo.lu. Wann ech sou e Link geschéckt kréien, da ginn ech als éischt op di Säit kucken, wat sech do genau befënnt. Wéi dat am Ufank en automatiséierte Prozess war, krut ech vill Spam geschéckt, duerfir hun ech dunn ugefaangen dat ze moderéieren. Ech decidéieren vun Fall zu Fall, unhand vun objektiven Kriterien (Bezuch zu Lëtzebuerg), op déi Säit an d’Blogbuerg passt oder net. Mat Léift vun Hand ausgeliëst, quasi.

Wéi ech dunn mol op kenuvo.lu kucke war (wat soll dee Numm iwwerhaapt bedeiten?), huet mech direkt mol e Sproch erschreckt: “Le premier blog au Luxembourg”. Op der Säit selwer, stoung soss näischt. Dat war am Nomëtten, Owes wor d’Säit dunn awer richteg lancéiert.

Mee och schon mëttes, konnt ech alleng unhand vun deem Sproch des Säit genee aklasséieren, ouni se lo weider z’ënnersichen. Ech hu se natierlech trotzdem an d’Blogbuerg agedroen, well objektiv näischt dogéint schwätzt. Ech deelen iech mol mäi Virurteel iwwert déi Säit mat: Opgesat gouf se vun enger francophoner Persoun, di an der Belsch oder wuel éischter dem Frankräich wunnt oder viru kuerzem hei hin geplënnert ass. Et ass eng Privatpersoun, och wann d’Säit engem e bëssen den Androck gëtt, wéi wann eng Agence dohannert géing stiechen. Desweideren schéngt des Persoun net vill Ahnung vun lëtzebuergesche Blogen ze hunn. Just well ee kéng deem entspriechend Säite kennt, heescht dat net, datt se net existéieren. Ech froe mech och, firwat ech iwwert d’Blogbuerg d’Säit proposéiert kréien an déi Persoun sech d’Blogbuerg anscheinend mol guer net ugekuckt huet, soss hätt se jo misste gesinn, datt et duerchaus eng grouss Aktivitéit an deem Beräich um lëtzebuergeschen Internet gëtt. Dat Ganzt erënnert mech e bëssen un blog.lu, iwwert dat ech schon am Dezember 2005 (!) geschriwwen haat. Déi haten och geduecht, se wiren déi éischt an der lëtzebuergescher “Blogosphere”, opschons anerer dat domols schon zënter Joere gemat hunn. Dat do war lo meng reng subjektiv Vue vun der Säit; ech loosse mech awer gären dees Besseren iwwerzeegen a wënschen dem Site vill Succès. Mol kucken, wéi d’Diskussioun iwwert dës nei Säit sech wäert weider entwéckelen. Ech hu mer alt schon Popcorn prett gestallt.

Zur Säit selwer: d’Iddi ass eigentlech net schlecht, e lëtzebuergesche Blog (awer op franséisch) iwwert Technologien a soss Neies ze maachen. Leider awer net originell oder guer original. An de Saatz “Proposer une news” geet jo wuel iwwerhaapt net. “Une” news, sérieux? Weiblech an am Singulier? Tztztz…

This entry was posted in Blogs, Internet & PC. Bookmark the permalink.

3 Responses to popcornschluecht

  1. Thierry says:

    Ech wollt hinnen elo ee Kommentar schreiwen, dass si net den éischte Blog hei sinn. Mä ech hunn keng Loscht op déi Diskussioun déi dorauser garantéiert erëm entsteet, well eleng déi Ignoranz an Arroganz vu Kenuvo sech als Virreider mer schon op de Kichelche geet. An Ignoranz gouf et scho genuch an der Blogbuerg. Ey, esouguer eis léif Kolleege vu Vansken woussten, dass et lëtzebuergesch Blogge ginn!

    An:
    Et ass “la nouvelle” also och “la news” (obwuel esou Saachen ëmmer bescheuert kléngen, egal a wéi enger Sprooch). Mä falsch ass et net, well “news” ass och am Engleschen ee Singular. Et heescht: “here is the news”, net: “here are the news”. Just well do een “s” steet, mécht dat et net automatesch ee Plural. :)

  2. Joël says:

    Et ass ze waarm fir ze flamen, an Nationalfeierdag ass schon eriwwer. An Blogs iwwert all neie Fuerz vum Steve Jobs langweile mech.
    An pa, leeft egalwaat.lu eigentlech op engem 486er, den bei dir hannert dem Haus an engem Haischen aus Blech steet an mat ISDN un d’Internet ugeschloss ass?

  3. Tom says:

    Jojo, eis franséisch Kollegen an Friemsproochen, dat ass net sou einfach! ;)

    Ech war opallefalls uerg verwonnert fir mat zwee francophone Sysadmins ze diskutéieren déi dauernd vun hirer “réddatt” geschwat hunn an ech hat eng Ahnung wat se wollten. Am Endeffekt hunn se nëmmen d’Linux-Distributioun “Red Hat” gemengt, dei leider net sou ausgeschwat gëtt. :)

    An eng kleng Remarque “Kenuvo” ass franséische Slang fir “Qu’est-ce qu’il y a de nouveau”, reduzéiert op “Que nouveau” an da mat francophonem l33t sp34k dran.

Leave a Reply

Your email address will not be published. Required fields are marked *

*

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>